ჩინეთმა ტაივანის სანაპიროს წყლებში და მის გარშემო არსებულ 5 საჰაერო სივრცეში მასშტაბური სამხედრო წვრთნები დაიწყო სახელწოდებით - „Just Mission 2025“. ჩინეთის სამხედრო ძალების განაცხადებაში ნათქვამია - „მოცემული ქმედება წარმოადგენს მკაცრ გაფრთხილებას იმ სეპარატისტული და გარე ძალებისთვის, რომლებიც „ტაივანის დამოუკიდებლობის“ მოპოვებაზე მუშაობენ და ცდილობენ ჩაერიონ მის შიდა საქმეებში. გადადგმული ნაბიჯი წარმოადგენს ლეგიტიმურ და აუცილებელ ზომას ჩინეთის სუვერენიტეტისა და ეროვნული ერთიანობის დასაცავად.“
წინა საჰაერო და საზღვაო სივრცის დარღვევებისგან განსხვავებით, მოცემული სამხედრო წვრთნა წარმოადგენს ჩინეთის პირველ მასშტაბურ ტაივანის სანაპიროსთან მიმდინარე წლის აპრილის შემდეგ. მანამდე, აშშ-ის ადმინისტრაციამ ტაივანისთვის 11,1 მილიარდი დოლარის ღირებულების იარაღის გაყიდვა დაამტკიცა. ჩინეთის მიერ ტაივანზე მზარდი სამხედრო და დიპლომატიური ზეწოლის ფონზე (პეკინი მას თავის გამოყოფილ პროვინციად მიიჩნევს), 18 დეკემბერს ტაივანის მთავრობამ გაავრცელა განცხადება, რომელშიც აშშ-თან გამორმებული შეთანხმების დეტალებია განხილული. ის მოიცავს HIMARS-ის სარაკეტო სისტემების, Javelin-ის ტანკსაწინააღმდეგო რაკეტების, Altius-ის დრონების, ჰაუბიცების და აღჭურვილობისთვის საჭირო სხვა კომპონენტების მიწოდების საკითხებს. პეკინმა დაგეგმილი შეთანხმება მკაცრად გააკრიტიკა. საგარეო საქმეთა სამინისტროს განაცხადებაში ნათქვამია, რომ ეს ნაბიჯი დაარღვევს ჩინეთსა და აშშ-ს შორის დიპლომატიურ შეთანხმებებს, სერიოზულად შეარყევს ჩინეთის სუვერენიტეტს, უსაფრთხოებას, ტერიტორიულ მთლიანობას და სტაბილურობას რეგიონში.
ტაივანი ნაწილობრივ აღიარებული დემოკრატიული სახელმწიფოა. მისი მოსახლეობა დაახლოებით 23 მილიონ ადამიანს შეადგენს, რომელსაც პეკინი ჩინეთის სახალხო რესპუბლიკის განუყოფელ ნაწილად („გამოყოფილ პროვინციად“) მიიჩნევს. თავად კუნძულის ხელისუფლება უარყოფს „ერთი ქვეყანა, ორი სისტემის“ მოდელს, რომელსაც 1980-იანი წლებიდან მოყოლებული მხარს უჭერს პეკინი. ბოლო წლებში ჩინეთმა ტაივანის სანაპიროსთან არაერთხელ ჩაატარა მასშტაბური სამხედრო წვრთნები, რაც ზოგიერთი სამხედრო ანალიტიკოსის მიერ "შეჭრის რეპეტიციად" შეფასდა. უცხოური სამხედრო გემების ნებისმიერი გადაადგილება ტაივანის მატერიკული ჩინეთისგან გამყოფი სრუტის გამოყენებით პეკინის მხრიდან აღიქმება როგორც პროვოკაცია.
სი ძინპინმა თავის საჯარო გამოსვლებში არაერთხელ ისაუბრა ტაივანის ჩინეთთან „გაერთიანებაზე“ და კუნძულზე სუვერენიტეტის დამყარების ბოლო ვადად 2027 წელი დაასახელა. ტრამპის მეორე საპრეზიდენტო ვადა 2029 წლის დასაწყისში სრულდება. ვაშინგტონი არ აღიარებს ტაივანის დამოუკიდებლობას და ტაიპეისთან დიპლომატიური ურთიერთობებიც არ აქვს. იარაღის გაყიდვას ის 1979 წელს მიღებული „ტაივანის ურთიერთობების შესახებ“ კანონის შესაბამისად ახორციელებს, რომელი დოკუმენტიც თავდაცვის მიზნით მისთვის იარაღის მიწოდებას ითვალისწინებს.
იხილეთ ლინკები👇👇👇
Comments
Post a Comment