მაშინ, როდესაც დონალდ ტრამპი ირანზეა კონცენტრირებული, რუსეთი აქტიურად აძლიერებს თავის პოზიციებს მადაგასკარზე. ქვეყნის ახალმა ხელმძღვანელობამ, რომელიც გასული წლის ოქტომბერში მომხდარი სამხედრო გადატრიალების შედეგად მოვიდა ხელისუფლებაში, საჯაროდ მადლობა გადაუხადა მოსკოვს ვერტმფრენების, სამხედრო აღჭურვილობისა და ჰუმანიტარული დახმარების მიწოდებისთვის.
მას შემდეგ, რაც პოლკოვნიკ მაიკლ რანდრიანირინას ხელმძღვანელობით სამხედროებმა მადაგასკარში ხელისუფლება ხელში ჩაიგდეს, ხოლო თავად რანდრიანირინა ქვეყნის პრეზიდენტი გახდა, რუსეთმა სწრაფად განალაგა კუნძულზე სამხედრო ძალები და იარაღი, როგორც რეჟიმის უსაფრთხოების უზრუნველსაყოფად, ასევე ეკონომიკური კავშირების გასაძლიერებლად.თებერვალში რანდრიანირინამ პირველი უცხოური ვიზიტი მოსკოვში განახორციელა, სადაც ვლადიმირ პუტინის შეხვდა. ამით მან დაარღვია მადაგასკარის ლიდერების მრავალწლიანი ტრადიცია, რომლის მიხედვითაც პირველი ვიზიტი ყოფილი მეტროპოლიის დედაქალაქში პარიზში ხორციელდებოდა.
Bloomberg-ის მიერ გამოკითხული ანალიტიკოსების შეფასებით - მოსკოვი აქტიურად აძლიერებს თავის გავლენას მთლიანად აფრიკის კონტინენტზე, სარგებლობს რა იმ გარემოებით, რომ ირანთან ომის ფონზე აშშ-ის ყურადღება ამ სწორედ ამ მოვლებენზეა კონცენტრირებული. თავად მადაგასკარს მნიშვნელოვანი სტრატეგიული მნიშვნელობა აქვს, ის მდებარეობს ინდოეთის ოკეანის ნავთობმომარაგების ერთ-ერთ მთავარ მარშრუტზე და მდიდარია მინერალური რესურსებით, მათ შორის კობალტით, გრაფიტით, იშვიათი ლითონებით (მსოფლიოში მე-8 ადგილზეა).
რუსეთმა ქვეყანას უკვე მიაწოდა შეიარაღების ახალი პარტია და უახლოეს პერიოდში გეგმავს ადგილობრივი სამხედრო ძალებისთვის წვრთნების ჩატარებას. დასავლელი დიპლომატების შეფასებით, მოსკოვი რეგიონში პოზიციების განმტკიცების მიზნით, მადაგასკარის ახალ ხელისუფლებას სთავაზობს თანამშრომლობის ფორმულას - „უსაფრთხოება პოლიტიკური მხარდაჭერის სანაცვლოდ“. თავად კუნძულოვანი სახელმწიფოსთვის კი რუსეთთან თანამშრომლობა წარმოადგენს როგორც ევროკავშირსა და საფრანგეთზე დამოკიდებულების შემცირების, ისე მოქმედი რეჟიმის შიდა პოზიციების გამყარების საშუალებას.
აღნიშნული ქმედებებით, რუსეთი ცდილობს არსებული გარდამავალი პერიოდის მიერ შექმნილი შესაძლებლობების მაქსიმალურად გამოყენებას. შეიქმნა პრორუსული პოლიტიკური პარტია „აფრიკული ინიციატივა“, რომელიც წარმოადგენს ერთ-ერთი პრო-რუსული ორგანიზაციის „რუსეთის მეგობრების“ პოლიტიკურ ფრთას. ეს ახლადწარმოქმნილი ვითარება მადაგასკარში პირდაპირ გავლენას ახდენს აფრიკისა და ინდო-წყნარი ოკეანის რეგიონების დამაკავშირებელი მნიშვნელოვანი გეოსტრატეგიული სივრცის სტაბილურობაზე.
აქვე უნდა აღინიშნოს, რომ ეს არ არის რუსეთის პირველი მცდელობა მადაგასკარში გავლენის დამყარების მიმართულებით. The New York Times-ის 2019 წლის ინფორმაციით, 2018 წლის არჩევნების პერიოდში რუსმა აგენტებმა გამოსცეს გაზეთი, დააფინანსეს ახალგაზრდების მონაწილეობა საპროტესტო აქციებში და მხარი დაუჭირეს ჟურნალისტებს, რათა უზრუნველეყოთ პრეზიდენტ ჰერი რაჯაონარიმამპიანინას ხელახალი არჩევა, რაც საბოლოოდ ვერ განხორციელდა.
ფოტო: პუტინი და მადაგასკარის პრეზიდენტი რანდრიანინა კრემლში შეხვედრაზე (19.02.2026).
იხილეთ ლინკი 👇👇👇
Comments
Post a Comment